Беҳдошти низоми тандурустӣ

Душанбе, 9 август (АМИТ «Ховар», Кристина Эрлих). – Мадад ба беҳдошти кори низоми давлатии тандурустии кишварҳои Осиёи Марказӣ ҷиҳати расонидани хизмати хушсифати тиббӣ ба гурӯҳҳои осебдидаи аҳолӣ мақсади асосии лоиҳаи минтақавии «Беҳдошти низоми тандурустӣ» маҳсуб мешавад, ки имрӯз дар Тоҷикистон амалӣ мегардад. Лоиҳаро Агентии оид ба рушди байналмилалии ИМА маблағгузорӣ мекунад. Тавре дар намояндагии Агентии мазкур ба хабарнигори АМИТ «Ховар» иттилоъ доданд, манзури лоиҳа иборат аз расонидани кӯмаки техникӣ, таълиму тарбия, ба ҷумҳурӣ овардани таҷҳизот ва асбобу анҷоми тиббӣ мебошад. Маблағи умумии лоиҳа 72 миллион доллари ИМА – ро ташкил медиҳад.Қобили зикр аст, ки Агентии рушди байналмилалии ИМА ба Тоҷикистон ҷиҳати ислоҳи низоми нигаҳдории тандурустӣ ба манзури расонидани хизмат ба беморон кӯмак мекунад. Ин лоиҳа дар Тоҷикистон, Қазоқистон, Қирғизистон, Ӯзбекистон ва Туркманистон амалӣ мегардад.