Бунёди нахустин Осорхонаи табиӣ-таърихӣ дар Душанбе

Душанбе, 16 август. (АМИТ «Ховар», Марзия Саидова).-Интизор меравад, ки рӯзҳои наздик хишти аввали Осорхонаи табиӣ-таърихӣ гузошта шавад. Масъалаи мазкур зимни мулоқоти сафири Ҷумҳурии Исломии Эрон дар Ҷумҳурии Тоҷикистон Алиасғари Шеърдӯст бо Раиси Кумитаи ҳифзи муҳити зисти Тоҷикистон Талбак Салимов дар Душанбе баррасӣ гардид.Аз равобити умумии сафорати Эрон дар Тоҷикистон ба АМИТ «Ховар» иттилоъ доданд, ки мусоҳибон дар доираи мулоқот масъалаҳои тавсеаи ҳамкориҳои мутақобилан судманди Тоҷикистону Эрон дар бахши ҳифзи муҳити зистро баррасӣ намуданд. Дипломати эронӣ афзуд, ки кишвараш аз лиҳози мавқеияти ҷуғрофияш дорои иқлими хубу мусоид буда, имкон дорад дар бахши ҳифзи муҳити зист ва масъалаҳои марбут ба ин соҳа бо Тоҷикистон ҳамкории густурда дошта бошад. Шеърдӯст гуфт, ки бо бунёди осорхонаи табиӣ- таърихӣ дар Душанбе, ки Эрон ба он саҳмгузорӣ менамояд иқтидори туристии Тоҷикистон афзоиш меёбад. Сохтмони Осорхонаи табиӣ-таърихӣ дар Душанбе яке аз дастовардҳои соҳибистиқлолии Тоҷикистон хоҳад буд.Бояд тазаккур дод, ки чанде пеш дар Теҳрон байни роҳбарони идораҳои ҳифзи муҳити зисти ҳар ду кишвар Ёддошти тафоҳум дар хусуси ҳамкории Тоҷикистону Эрон дар бахши муҳити зист ба имзо расида буд, ки тибқи он мутахассисони бахши муҳити зисти Тоҷикистон дар Эрон курсҳои бозомӯзӣ ва такмили ихтисосро мегузаранд. Ин санад ҳамчунин, ба таҳкими ҳар чӣ бештари ҳамкориҳои судманди ҳар ду кишвар дар бахши ҳифзи муҳити зист дар сатҳи минтақавӣ ва байналмилалӣ мусоидат менамояд.