Дар ду рӯз се сӯхтор, дар 7 моҳ чӣ?

Душанбе, 11 август. (АМИТ «Ховар», Лаззат Диловарзод).- Бино ба иттилои масъули маркази матбуоти Сарраёсати Хадамоти давлатии оташнишонӣ дар давоми ду рӯзи аввали ҳафтаи дуюми моҳи августи соли 2011 дар шаҳри Душанбе се ҳодисаи нохуши сӯхтор: яке дар кӯчаи Неъмат Қарабоеви ноҳияи Фирдавсӣ, хонаи 29, дуюм дар кӯчаи Рӯдакӣ — 100 ва сеюм дар мағозаи «Элегант» -и бозори «Корвон» ба қайд гирифта шудааст, ки бар асари он ба соҳибони хонаҳои истиқоматӣ ва соҳибкорону савдогарон хисороти зиёди молӣ расидааст.Тибқи маълумоти сардори шӯъбаи нозироти ташкилии Сарраёсати Хадамоти оташнишонии Вазорати корҳои дохилӣ Ашур Хоҷаев, аз аввали соли ҷорӣ то 10 –уми августи соли 2011 дар миқёси ҷумҳурӣ 656 ҳодисаи сӯхтор ба қайд гирифта шуд, ки хисороти аз он ба мардум расида 9 млн. 931 ҳазор сомониро ташкил намуда, 17 нафар шаҳрванд ба ҳалокат расидааст. Шумораи ашхоси дар соли 2010 дар натиҷаи сӯхтор ба ҳалокатрасида 22 нафарро ташкил додааст. Хушбахтона, дар се сӯхтори даҳаи якуми моҳи августи соли ҷорӣ касе ба ҳалокат нарасидааст. Зарари он ҳанӯз аз тарафи кормандони Хадамоти оташнишонии Вазорати корҳои дохилӣ муайян нашудааст, аммо шоҳидони ҳодиса онро беш аз 2 млн. сомонӣ арзёбӣ менамоянд.