Фаъолияти ширкати «Эмалто» тафтиш мешавад

Душанбе, 16 август. (АМИТ «Ховар», Лаззат Диловарзод).- Аз Хадамоти федералии муҳоҷирати Русия ба ҳамтоёни тоҷикистонии худ иттилоъ доданд, ки дар шаҳри Краснодари ФР 40 нафар шаҳрвандони Ҷумҳурии Тоҷикистонро аз боздошти иҷборӣ озод кардаанд.Ба иттилои манбаъ, бештари шаҳрвандони Тоҷикистон аз вилояти Суғд буда, дар ширкати пойафзолбарории «Эмалто» кор мекардаанд. Дар давоми фаъолияташон онҳо ба меҳнати ройгон ҷалб карда шудаанд, ки ин тибқи қонунгузории ФР нақзи сангинтарини ҳуқуқи инсон маҳсуб меёбад.Дар натиҷаи андешидани тадбирҳои фаврии Хадамоти Федералии муҳоҷирати Русия ва мақомоти прокуратураи он музди меҳнати шаҳрвандони Тоҷикистон бо пардохти ҷуброни таъхир аз ширкати «Эмалто» ситонида шуда, як қисми ин муҳоҷирон ба ватан баргардонида шуданд.Айни замон прокуратураи шаҳри Краснодар нисбат ба фаъолияти ширкати мазкур тафтишот мебарад. Дар сурати пурра собит шудани қонуншиканӣ нисбат ба шаҳрвандони Тоҷикистон ва дар ғуломӣ нигоҳ доштани онҳо роҳбарони ширкатро ҷазои сангин интизор аст.