Филми коргардони тоҷик дар фестивали «Киношок – 2011»

Душанбе, 30 август (АМИТ «Ховар», Ҳалима Хушқадамова). – Дар Фестивали ХХ кушодаи ҷашнии кишварҳои аъзои ИДМ, Латвия, Литва ва Эстония — «Киношок – 2011», ки аз 11 то 20 сентябр дар шаҳри Анапаи кишвари Краснодари Русия баргузор мегардад, филми коргардони тоҷик Фарҳод Абдуллоев намоиш дода мешавад. Ба ҳайати ҳаками барномаҳои озмунии фестивал ходимони барҷастаи фарҳанги Русия, ИДМ ва Балтия Ирина Антонова, Роман Витюк, Виктор Ерофеев, Андрей Битов, Владимир Маканин, Павел Каплевич, Владимир Достал, Святослав Бэлза ва дигарон шомиланд. Фестивали кушодаи кинои кишварҳои ИДМ, Латвия, Литва ва Эстония таҳти васояти Маъмурияти Президент ва Ҳукумати Федератсияи Русия ва дастгирии Бунёди байнидавлатии ҳамкории башардӯстонаи давлатҳои аъзои ИДМ сурат мегирад. Роҳбари Маъмурияти Президенти Русия Сергей Наришкин масъули Кумитаи ташкилии фестивал мебошад. Дар ин бора дар дафтари матбуоти Бунёди байналмилалии ҳамкории башардӯстонаи давлатҳои аъзои ИДМ ба хабарнигори АМИТ «Ховар» дар Федератсияи Русия иттилоъ доданд.