Ифтитоҳи корхонаи ордбарорӣ дар Рашт

Душанбе, 26 август. (АМИТ «Ховар», Дилшодаи Хайрулло). – «Рушди соҳибкории хурду миёна дар истеҳсолот ва хизматрасониҳо, инчунин ташкили маҷмааҳои туристӣ ва рушди сайёҳӣ дар ноҳия, ба ин васила ташкили ҷойҳои нави корӣ ва баланд бардоштани сатҳи зиндагии мардум бояд ҳамчун яке аз самтҳои минбаъдаи тараққиёти ноҳия қарор дода шавад»-гуфт имрӯз зимни суханронии худ Президенти мамлакат Эмомалӣ Раҳмон дар ноҳияи Рашт. Дар ноҳияи Рашт то ба имрӯз аз тарафи Иттиҳодияи истеҳсолии «Нассоҷии Тоҷик» ва корхонаи «Ёқут» коргоҳҳои дӯзандагӣ таъсис дода шудаанд. Дар нимаи якуми соли ҷорӣ дар ноҳияи Рашт корхонаи панирпазӣ бо иқтидори коркарди як тонна шир дар як шабонарӯз, коргоҳи шарбаттайёркунӣ — филиали Ҷамъияти саҳҳомии «Душанбе» бо иқтидори 20 ҳазор декалитр нӯшокиҳои ташнашикан сохта ба истифода дода шуданд ва имрӯз боз як корхонаи нави истеҳсолӣ — корхонаи ордбарорӣ бо иқтидори коркарди 70 тонна ғалла дар як шабонарӯз мавриди баҳрабардорӣ қарор дода шуд.Илова бар ин дар ноҳия корхонаи хиштбарорӣ бо иқтидори 5 миллион дона ва сехи истеҳсоли қуму шағал бо иқтидори 5 ҳазор метри мукааб бунёд гардида, 35 нафар шаҳрвандон бо ҷойи кор таъмин шудаанд.