Изи ангуштони киро гирифтанд?

Душанбе, 29 август. (АМИТ «Ховар», Лаззат Диловарзод).- Бино ба гуфти сардори шӯъбаи таъминоти назорати (ШТН) — и Раёсати корҳои дохилии шаҳри Душанбе полковники милиса Қудратулло Ғуломов, тибқи чорабиниҳои фаврӣ — пешгирикунии Вазорати корҳои дохилии ҶТ аз 19 –уми май то 20 – уми августи соли ҷорӣ бо мақсади амнияти аҳолии шаҳри Душанбе дар баргузории ҷашни 20 – солагии Истиқлолияти давлатӣ амалиёти «Тартибот» ҷамъбаст гардид. Дар марҳилаи гузаронидани амалиёт 419 кӯчаи 99 маҳалла ва 44 шаҳрак мавриди санҷиш қарор гирифт. Дар амалиёт 78 ҳазору 320 хонаи маҳаллӣ, 3 ҳазору 40 хонаи баландошёна, 180 иншооти нотамом, 23 меҳмонхона ва 28 масҷиди ҷомеъ санҷида шуд.Зимни амалиёт беш аз 581 ҳазору 500 нафар истиқоматкунандагон санҷида шуданд. Дар ин санҷиш муайян шуд, ки дар пойтахт 900 нафар шаҳрвандони хориҷӣ ва бетабаа, қариб 1850 шаҳрванд дар қайди профилактикии шӯъбаи корҳои дохилии ноҳияҳои шаҳри Душанбе зиндагӣ мекунанд. Дар рафти амалиёт аз тарафи кормандони мақомоти умури дохилӣ 9 ҳолати гардиши ғайриқонунии маводи нашъадор ошкор шуда, 35 нафар ҷинояткорони дар кофтуков қарордошта дастгир шуданд. Зимни ин амалиёт 4 ҳазору 600 нафар шаҳрвандон ба шӯъбаҳои корҳои дохилӣ оварда шуда, намунаи изи ангуштонашон гирифта шуд.