Кӣ соҳиби «Овози тиллоӣ» шуд?

Душанбе,15 август. (АМИТ «Ховар», Ҳотам Рабиев).- Даври ниҳоии озмуни фарҳангии «Овози тиллоӣ» ҷамъбаст гардид. Дар даври ниҳоӣ 17 нафар беҳтаринҳо ширкат варзида, бо тӯҳфаҳо қадрдонӣ шуданд. Аз ҷумла, дар жанрҳои «мақом» — Фирдавс Неъматов (Конибодом), «эстрада» — Бахтовар Маҳмудов (Душанбе), «суруди халқӣ» — Дубаи Умар (Кӯлоб) ва «фалак» — Чоршанбе Аловатов (Душанбе) маҳорати хосса нишон доданд.Директори Муассисаи давлатии телевизиони кӯдакон ва наврасон «Баҳористон» Зевар Давлатова зимни сӯҳбат бо мухбири АМИТ «Ховар» иброз дошт, ки озмуни имсола аз озмунҳои солҳои қаблӣ фарқи зиёд дошт, зеро кормандони телевизиони «Баҳористон» ба кулли минтақаҳои ҷумҳурӣ сафар карда, истеъдодҳои навро, ки ҳамқадами соҳибистиқлолии Тоҷикистон ҳастанд, кашф карданд. Онҳо воқеан соҳибистеъдод буда, ояндаи дурахшон доранд. Ёдовар мешавем, ки озмуни «Овози тиллоӣ»тайи ду сол бо ташаббуси Муассисаи давлатии телевизиони кӯдакону наврасон «Баҳористон» идома карда, дар он наздики 1600 нафар кӯдакону наврасон аз тамоми манотиқи ҷумҳурӣ иштирок намуданд. Маврид ба зикр аст, ки озмуни «овози тиллоӣ» соли оянда ҳам бо мазмуну мӯҳтавои нав ва хубтару ҷолибтар идома хоҳад кард.