«Кӯлоб-текстайлз» бо иқтидори пурра фаъолият менамояд

Душанбе, 25 август. (АМИТ «Ховар», Кристина Эрлих). – Корхонаи муштараки Тоҷикистону Австралия «Кӯлоб-текстайлз» истеҳсоли маҳсулоти худро бо иқтидори пурра дар се баст ба роҳ мондааст. Дар ин бора ба хабарнигори АМИТ «Ховар» аз Вазорати энергетика ва саноати ҶТ иттилоъ доданд. Тавре сардори раёсати саноати сабуки Вазорати энергетика ва саноати ҶТ Гулчеҳра Сангинова хабар дод, барои фаъолият дар се баст зиёда аз 100 нафар ҷалб гардидаанд. Барои истеҳсоли маҳсулот ашёи хоми маҳаллӣ, яъне нахи пахтаи истеҳсоли маҳаллӣ истифода мешавад. Корхонаи мазкур бо таҷҳизоти муосир ҷиҳозонида шудааст. Ин имкон медиҳад, ки корхона ба таври мураттаб кор кунад. «Иқтидори солонаи корхонаи «Кӯлоб- текстайлз» истеҳсоли 2 ҳазор тонна калобаи хушсифат буда, маҳсулоти худро асосан ба беруни кишвар содир менамояд», зикр намуд Гулчеҳра Сангинова.