Мавсими қабул ва боздошти омӯзгор

Душанбе, 4 август. (АМИТ «Ховар», Лаззат Диловарзод).- Тибқи маълумоти Раёсати Агентии назорати давлатии молиявӣ ва мубориза бо коррупсияи ҶТ дар вилояти Суғд омӯзгори Донишкадаи политехникии шаҳри Хуҷанд А.А (исмаш барои халалдор нашудани рафти тафтишот оварда нашудааст) бо мақсади дохил намудани довталаб ба донишкадаи мазкур ва бо роҳи тамаъҷӯӣ гирифтани пора ба андозаи 2 ҳазору 300 доллар айбдор дониста шуд.Тибқи маълумоти мавҷуда омӯзгори калони кафедраи забонҳои хориҷии Донишкадаи политехникии шаҳри Хуҷанд А.А ҳангоми гирифтани пора аз тарафи кормандони Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд боздошт шудааст. Нисбат ба омӯзгори номбурда бо моддаи 247 қ.2 (қаллобӣ) –и КҶ ҶТ парвандаи ҷиноӣ боз гардида, тафтишот бурда мешавад.