Мулоқоти О. Оқилов бо Арбоб Оламгир Хон

Душанбе, 9 август.(АМИТ «Ховар», Дилшодаи Хайруллоҳ).-Имрӯз Сарвазири Ҷумҳурии Тоҷикистон Оқил Оқилов бо Вазири коммуникатсияи Ҷумҳурии Исломии Покистон Арбоб Оламгир Хон мулоқот кард. Дар вохӯрӣ вазъи кунунӣ ва дурнамои ҳамкориҳои дуҷонибаи иқтисодию тиҷоратии Тоҷикистон ва Покистон мавриди баррасӣ қарор дода шуд. Таваҷҷӯҳи асосӣ ба масоили сохтмони роҳҳои оҳану автомобилгард ва хатҳои интиқоли барқу газ, аз ҷумла роҳи автомобилгарди Тоҷикистон-Покистон тавассути марзи Афғонистон, лоиҳаи сохтмони роҳи оҳани байни Туркманистон-Афғонистон-Покистон бо пайвастшавӣ бо роҳи оҳани Тоҷикистон, лоиҳаи сохтмони хатти интиқоли гази Туркманистон-Афғонистон- Покистон ва Ҳиндустон, ки дар оянда Тоҷикистон низ ба он пайванд мегардад инчунин лоиҳаи сохтмони хатти интиқоли барқи 500 кВт «Касса-1000» зоҳир карда шуд. Дар мулоқот ҳамчунин дигар масоили мавриди таваҷҷӯҳи тарафайн қарор дошта баррасӣ шуданд.