Мусоҳибаи сафир бо «Садои Хуросон»

Душанбе, 29 август.(АМИТ «Ховар», Марзия Саидова).-Давлаталӣ Ҳотамов, Сафири Фавқулодда ва Мухтори Ҷумҳурии Тоҷикистон дар Ҷумҳурии Исломии Эрон зимни сӯҳбат бо бахши тоҷикии радиои «Садои Хуросон»-и Эрон» Истиқлолияти Тоҷикистонро неъмати бузург ва ҷашни барои тоҷикон ва тоҷикистониён муқаддас номид. Дипломати тоҷик зимни сӯҳбаташ таъкид кард, ки барои мардуми Тоҷикистон Истиқлолияти давлатӣ бо заҳмати зиёд ба даст омадааст, аз ин рӯ мо онро чун гавҳараки чашм ҳифз мекунем. Д.Ҳотамов ҳамчунин ба дастовардҳои 20 соли Тоҷикистон ишора намуда, муваффақиятҳои Тоҷикистонро дар арсаи роҳсозӣ, бунёди нерӯгоҳҳои барқи обӣ, фазои солими амниятӣ, пешрафтҳои иқтисодию иҷтимоӣ ва фарҳангӣ қобили ситоиш унвон кард.Мавсуф афзуд, ки ҳамаи музаффариятҳо дар боби ҳамдилию ҳамкории муштараки мардум бо давлат ва пайравӣ аз сиёсати оқилонаи сарвари давлати Тоҷикистон Эмомалӣ Раҳмон ба даст омадаанд.Ба қавли Шоҳмансури Шоҳмирзо, намояндаи фарҳангии Тоҷикистон дар Муассисаи фарҳангии ЭКО, мусоҳибаи Сафири Тоҷикистон дар Эрон дар ду бахши барномаи тоҷикии «Садои Хуросон»- дар гуфторҳои субҳгоҳӣ ва шабонгоҳии радио пахш шуд. Бахши тоҷикии «Садои Хуросон» қариб 20 сол аст, ки барои Тоҷикистон барномаҳои мухталиф пахш мекунад ва маркази он дар шаҳри Машҳади Эрон аст. «Садои Хуросон» 6 соат барнома дошта, 3 соаташ субҳгоҳон ва 3 соати дигараш шабонгоҳ пахш мегардад.