Мусоидати техникӣ дар соҳаи ҳифзи иҷтимоӣ

Душанбе, 9 август. (АМИТ «Ховар», Дилшодаи Хайруллоҳ).- Агентии давлатии ҳифзи иҷтимоӣ, шуғли аҳолӣ ва муҳоҷират ҷиҳати муайян намудани дурнамои талабот ва пешниҳод ба қувваи корӣ дар ҳамкорӣ бо лоиҳаи Комиссияи Аврупо- «Мусоидати техникӣ оид ба Барномаи дастгирии сиёсати секторалии бахши ҳифзи иҷтимоӣ-ҷузъи сиёсати меҳнат» усули пурсиши корфармоёнро таҳия кард.Бобати пиёда намудани ин усул дар се ноҳияи интихобӣ: Темурмалик, Мастчоҳ ва Синои шаҳри Душанбе санҷиши амалии он ба роҳ монда шуд. Ин кор дар таҷриба нахустин буда, ояндаи наздик роҳандозӣ намудани он дар фаъолияти тамоми сохторҳои тобеи мақомоти давлатии шуғли аҳолӣ дар назар аст.Татбиқи амалии усул имконият фароҳам меорад, ки дурнамои талаботи корфармоён ба қувваи корӣ, ташкили раванди таълими касбӣ вобаста ба талаботи бозори меҳнат ва сатҳу сифати хизматрасониҳои мақомоти давлатии шуғли аҳолӣ аз ҷониби корфармоён низ арзёбӣ гардад.