Намоишгоҳи 13-умини байналхалқӣ дар Остона

Душанбе, 1 август. (АМИТ «Ховар», Покиза Маҳмадбекова). — Аз 2 то 4 ноябри соли 2011 дар шаҳри Остонаи Ҷумҳурии Қазоқистон Намоишгоҳи 13-умини байналхалқии кишоварзӣ ва саноати хӯроквории «Агропродэкспо»-и Қазоқистон баргузор мегардад.Тавре ба АМИТ «Ховар» аз Палатаи савдо ва саноати ҶТ иттилоъ доданд, дар намоишгоҳи мазкур корхонаҳо ва ширкатҳои маводи ғизоии ҶТ даъват шудаанд. Ширкати намоишгоҳи байналхалқии «Атакент-Экспо» бо дастгирии расмии Вазорати кишоварзии Қазоқистон, Ҳукумати шаҳри Остона таҳти васояти Шӯрои роҳбарони Палатаҳои савдо ва саноати давлатҳои-аъзои Иттиҳоди давлатҳои мустақил ташкилкунандагони намоишгоҳи мазкур маҳсуб мешаванд.Ҳадафи баргузории намоишгоҳ ба маърази тамошо гузоштани дастовардҳои истеҳсолкунандагони маҳсулоти ватанию хориҷӣ, таҷҳизот мошинолот ва технологияҳои муосир мебошад.