Намоиши китобҳои нашриёти «Адиб»

Душанбе, 12 август. (АМИТ «Ховар», Ҳотам Рабиев). – Дар бинои Иттифоқи нависандагони Тоҷикистон намоиши китобҳои тозанашри нашриёти «Адиб» доир гардид.Ин чорабинӣ ба 20-солагии Истиқлолияти давлатии Ҷумҳурии Тоҷикистон бахшида шуда, то 4 сентябр, яъне рӯзи китоб аз ҷониби нашриёти дигар низ идома меёбад. Намоиши китобҳои нашриёти «Адиб» табъи бинандаро шод мегардонад, зеро ҳам сифати китобҳо хубу ҳам шумораи китобҳои хонданӣ хеле зиёданд. Шоирону адибони маъруф зикр намуданд, ки соли ҷорӣ нашри 37 номгӯй китоб аз хазинаи Президент маблағгузорӣ гардид, қисми зиёди онҳо чоп шуда, қисмати дигар дар арафаи нашранд. Ҳамчунин 31 номгӯй китобҳои дигар бо маблағи соҳибкорону шахсони алоҳида чоп хоҳанд шуд. Дар ҷамъомад адибон Абдулҳамиди Самад, Холмурод Шарифов, Абдураҳмони Абдуманон, Гулрухсор, Гулназар, Низом Қосим, Кароматулло Мирзоев, Саттор Турсун, Асадулло Саъдуллоев ва дигарон роҷеъ ба саҳми нашриёти «Адиб» сухан ронда, барои боз ҳам беҳтар шудани сифати китобҳо маслиҳатҳои муфид доданд.