Омодагии пойтахт ба ҷашни Истиқлол

Душанбе, 23 август.(АМИТ «Ховар», Марзия Саидова).-Омодагии пойтахт ба ҷашни муқаддаси 20-умин солгарди Истиқлолияти давлатии Ҷумҳурии Тоҷикистон аз масъалаҳои умдае буд, ки дар ҷаласаи шаҳрдорӣ дар ҳузури Маҳмадсаид Убайдуллоев, Раиси шаҳри Душанбе баррасӣ шуд.Вобаста ба рӯзҳои башумор мондан ба ҷашни Истиқлолияти давлатии Ҷумҳурии Тоҷикистон ва ба анҷом расидани иҷрои нақшаи чорабиниҳои шаҳрдорӣ оид ба 900-рӯзи ободонӣ Раиси шаҳр ба масъулин дастур дод, ки тибқи таҷрибаи дар шаҳр роиҷгардида, корҳои омодагӣ чӣ дар иншооти ба истифодадиҳанда ё худ иншооти ба ин муносибат сохтмонашон оғозшаванда, дар маҷмӯъ дар тамоми қаламрави шаҳр бо ҳисси баланди масъулиятшиносӣ ва ифтихор аз сокини пойтахт будан роҳандозӣ гардад.