Парлумон лоиҳаи қонуни авфро баррасӣ намуд

Душанбе, 15 август.(АМИТ»Ховар», Марзия Саидова).- Лоиҳаи Қонуни Ҷумҳурии Тоҷикистон «Дар бораи афв» дар ҷаласаи ғайринавбатии Шӯрои палатаи поёнии парлумони мамлакат, ки 15 август таҳти раёсати Шукурҷон Зуҳуров, Раиси Маҷлиси намояндагони Маҷлиси Олии Ҷумҳурии Тоҷикистон баргузор гардид, баррасӣ шуд.Зикр шуд, ки лоиҳаи Қонуни мазкур, бо мақсади муайян намудани асосҳои ташкилӣ ва ҳуқуқии аз ҷониби давлат авф намудани маҳбусон ва дигар шахсони ҷиноят содирнамуда ба ифтихори 20 –умин солагарди ҷашни Истиқлолияти давлатии Ҷумҳурии Тоҷикистон таҳия гардидааст.Амали Қонуни Ҷумҳурии Тоҷикистон «Дар бораи афв», пеш аз ҳама, он шахсонеро фаро мегирад, ки аз нигоҳи ҷинс, синну сол, вазъи саломатӣ ва рафъи хавфнокии ҷинояти содиршуда ба авфи гуноҳ эҳтиёҷ доранд.Қонуни мазкур аз 29 модда иборат буда, дар он гурӯҳи шахсоне, ки нисбат ба онҳо афв татбиқ мегардад, тартиб ва мӯҳлати иҷрои санади зикргардида, мақомоти иҷрокунандаи ин санад, инчунин ҳалли дигар масъалаҳое, ки ба татбиқи Қонуни мазкур алоқаманданд, пешбинӣ гардидааст.Тибқи иттилои Муҳаммадато Султонов, котиби матбуоти Маҷлиси намояндагон, татбиқи Қонуни Ҷумҳурии Тоҷикистон «Дар бораи афв» амали инсондӯстона буда, ба кору зиндагии осоишта ва муҳити оила баргардонидани шахсони ҷиноят содирнамуда мусоидат менамояд.Лоиҳаи Қонуни Ҷумҳурии Тоҷикистон «Дар бораи афв» ба меъёрҳои Сарқонуни Ҷумҳурии Тоҷикистон, санадҳои меъёрии ҳуқуқии Ҷумҳурии Тоҷикистон ва санадҳои ҳуқуқии байналмилалии эътирофнамудаи Тоҷикистон мухолифат надорад.