Рӯ ба болоравӣ овардани истеҳсолоти саноатӣ

Душанбе, 19 август. (АМИТ «Ховар», Лаззат Диловарзод).- Аз Агентии омори назди Президенти ҶТ ба мухбири АМИТ «Ховар» иттилоъ доданд, ки ҳаҷми истеҳсолот дар саноати коркард дар давоми моҳҳои январ – июли соли 2011 ба 2 млрд. 398,3 млн. сомонӣ расонида шудааст. Аз он 1 млрд. 103,1 млн. сомониаш маҳсулоти хӯрокворӣ дар якҷоягӣ бо нӯшокиҳои ғайриспиртӣ ва тамоку, 396,4 млн. сомонӣ маҳсулоти нассоҷӣ ва дӯзандагӣ, 14, 2 миллионашро истеҳсоли маснуоти аз чӯб тайёршуда, 201,3 млн. маҳсулоти ғайрифилизии маъданӣ ва 47,7 миллионаш истеҳсоли маснуоти тайёри филизӣ мебошад.Бино ба маълумоти манбаъ, дар моҳҳои январ – июли соли 2011 ҳаҷми истеҳсоли маҳсулоти хӯрокворӣ 3,4 фоиз, маҳсулоти аз ҳисоби гӯшт истеҳсолшуда 5,8 фоиз, маҳсулоти ширӣ 33,1 фоиз, яхмос – 16,3, маснуоти қаннодӣ — 10, нӯшокиҳои ғайриспиртӣ — 18,5 ва маҳсулоти консервашуда 4,3 фоиз афзудааст.Болоравии истеҳсоли маҳсулоти саноатӣ дар Ҷумҳурии Тоҷикистон дар мавриде рӯ ба афзоиш дорад, ки ҷаҳон ба даври дуюми бӯҳрони иқтисодӣ гирифтор мегардад.