Садама ҷони 5 нафарро рабуд

Душанбе, 2 август. (АМИТ «Ховар», Лутфия Эшонқулова). – Бар асари ду садамаи нақлиётие, ки рӯзи 31 июли соли ҷорӣ дар шимоли кишвар ба вуқӯъ пайваст, 5 нафар ба ҳалокат расид.Тибқи иттилои ВКД ҷумҳурӣ ронандаи 25- солаи автомашинаи «Тайота -Сурф», истиқоматкунандаи ноҳияи Ғончӣ бехатарии ҳаракати роҳро риоя накарда, 3 нафар пиёдагардро пахш намуда, ба ҳалокат расонидааст. Дар натиҷаи ин садама мусофири мошини зикршуда ҷароҳати ҷисмонӣ бардошта дар беморхона бистарӣ шудааст. Инчунин, дар таърихи ҳамон рӯз дар ноҳияи Панҷакент садамаи марговари дигари нақлиётӣ рух дод. Ронандаи 27 солаи автомашинаи тамғаи «ГАЗ-5201» ҳангоми ҳаракат дар қаламрави ҷамоати Моғиён аз ӯҳдаи идораи мошин набаромада, ба ҷарии 146 метр афтод. Дар натиҷа худи ронанда ва мусофири дохили автомашина ҷароҳати вазнини ҷисмонӣ бардошта, дар ҷойи ҳодиса ба ҳалокат расиданд.