Ширкати ҳавопаймоии « Тоҷик Эйр» парки ҳавопаймоии худро ғанӣ месозад

Душанбе, 24 август. (АМИТ «Ховар», Лутфия Эшонкулова).- Ҷамъияти саҳҳомии кушодаи «Тоҷик Эйр» ояндаи наздик ба истифодабарии ҳавопаймоҳои истеҳсоли Русия «Сухой Суперджет-100» шурўъ менамояд.
 
Тавре ба мухбири АМИТ «Ховар» аз маркази матбуоти ширкати ҳавопаймоии мазкур хабар доданд, созишнома оид ба харидории 4 ҳавопаймои Sukhoi Superjet-100 аз ҷониби директори генералии ҶСК «Тоҷик Эйр» Музаффар Исҳоқов ва президенти ҶСП «Гражданские самолёты Сухого» Владимир Присяжнюк дар шаҳри Москва дар доираи намоишгоҳи байналмилалии ҳавопаймоиву кайҳонии МАКС-2011 ба имзо расид.
 
Мутобиқи санади мазкур ҳавопаймоҳо ба лизинги молиявӣ гирифта шуда, нахустин ду ҳавопаймои Sukhoi Superjet-100 соли 2013 вориди Душанбе мешаванд. Ҳавопаймоҳои Sukhoi Superjet-100 (LR) дар хатсайрҳои ҳавоии то 4500 км. тӯлдошта истифода шуда, дорои 98 ҷои нишаст мебошанд. Ҳавопаймоҳои мазкур, ки аз ҷиҳати иқтисодӣ самарaнок арзёбӣ мешаванд, минбаъд ҳавопаймоҳои «Ту-154»-ро иваз хоҳанд кард.