«Суман» ба Париж меравад

Август 30, 2011 11:34

Душанбе, 30 август.(АМИТ «Ховар», Марзия Саидова).- Ду ширкати ҳунарҳои дастии Тоҷикистон – «Суман» ва «Ҳафт пайкар» ҷиҳати иштирок дар намоишгоҳи байналмилалии тиҷоратии Ethical Fashion Show (намоишгоҳи ҳунарҳои зебо) ба Париж- пойтахти Фаронса мераванд. Дар намоишгоҳ ширкатҳои «Суман» ва «Ҳафт Пайкар» либосҳои миллии тоҷикон, гулдӯзиву зардузӣ ва дигар маҳсулоти миллии худро дар чаҳорчӯби яке аз маъруфтарин намоишгоҳҳои Аврупо, ки дар пойтахти Фаронса аз 1 то 4-уми сентябр баргузор мегардад, ба намоиш мегузоранд. Ин сафар дар чаҳорчӯби барномаи «Пешбурди тиҷорат дар Тоҷикистон» сурат мегирад. Барномаи мазкур аз ҷониби Маркази байналмилалии тиҷорат (МБТ) амалӣ ва аз ҷониби Идораи давлатии Швейтсария дар умури иқтисод (СЕКО) маблағгузорӣ мешавад. Дар ин намоишгоҳ ҳайъати Тоҷикистонро гурӯҳи мутахассисони МБТ роҳбаладӣ мекунад. Дар Ethical Fashion Show, ки дар соли 2004 таъсис шудааст, ба тарроҳии замонавӣ дар доираи ахлоқу маънавиёт ва бо назардошти масъулияти иҷтимоӣ ва муҳитзистӣ аҳамияти махсус дода мешавад. Ethical Fashion Show – намоишгоҳи байнулмилалии мӯд ва лавозимоти либос барои тарроҳони касбиву аслии соҳа буда, дар он соҳибони лоиҳаҳои мӯд, расонаҳо ва мардуми оддӣ низ иштирок мекунанд. Ҳафт сол қабл дар нахустин EFS ҳамагӣ 20 тарроҳи мӯд иштирок карда буд. Дар соли 2010 ин намоишгоҳ мизбони тақрибан 100 тарроҳи мӯд аз саросари Аврупо буд.Саидмӯъмин Камолов, раҳбари дафтари МБТ дар Тоҷикистон мегӯяд: «Иштироки корхонаҳои Тоҷикистон дар намоишгоҳи Париж имкони хубест то онҳо маҳсулоти худро дар саҳнаи байналмилалӣ намоиш диҳанд ва бо харидорони эҳтимолӣ робитаи мустақим барқарор намоянд. Ин намоишгоҳи касбӣ дар қалби Аврупо доир мешавад ва дар он аз саросари ҷаҳон маҳсулоте, ки бо назардошти меъёрҳои иҷтимоӣ ва муҳитзистӣ истеҳсол шудаанд, ба маърази тамошо гузошта мешаванд. Барои меҳмонони ин намоишгоҳ муҳим аст, ки таърихчаи офаридани ҳар як маҳсулотро бидонанд. Онҳо ҳамчунин ба чунин ҷанбаҳои маҳсулот, ба мисли назокату нафосат ва зебоии он ва имкони истеҳсоли он мувофиқ ба табъи харидори замонавӣ ва таҷрибадор аҳаммият хоҳанд дод.»Файзимоҳ Иброҳимова, мудири кулли корхонаи «Суман», умедвор аст, ки сафар ба Париж ба ӯ ва ба тавлидгарони дигари тоҷик имкон медиҳад, то аз тамоюлот, рангу усулҳои навин, матоъ ва либосвории саноати нассоҷӣ ва дӯзандагӣ дар кишвар ва беҳтар кардани зерсохтори идораи сифат бархурдор гарданд.

Август 30, 2011 11:34

Хабарҳои дигари ин бахш

Имрӯз дар Тоҷикистон ҳавои тағйирёбандаи бебориш пешгӯӣ мешавад
Имрӯз дар шаҳри Душанбе ҳаво то 16 дараҷа гарм мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Имрӯз дар водиҳои Тоҷикистон ҳаво 18 дараҷа гарм мешавад
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд
Мардуми ноҳияи Рашт дар симои Пешвои миллат наҷотбахши миллату давлат, кафили сулҳу ваҳдат ва эҳёгари фарҳанги миллиро мебинанд
Таҳти унвони «Нақши Пешвои миллат дар ташаккул ва рушди фарҳанги миллӣ» конференсияи ҷумҳуриявӣ доир шуд