Тӯҳфа аз ширкати «Тетис Петролиум»

Душанбе, 9 август. (АМИТ «Ховар», Дилшодаи Хайруллоҳ).- «Тетис Петролиум Лимитед» ширкати байналмилалии истихроҷи нафту газ мебошад, ки аз соли 2007 инҷониб дар ҷануби Тоҷикистон фаъолият намуда, ба рушди соҳаи нафту гази кишвар саҳм мегузорад ва аксарияти кормандонаш шаҳрвандони Тоҷикистон мебошанд. «Тетис Петролиум» эълом доштааст, ки бо сарпарастии ширкат барои минтақаи Қурғонтеппа як адад мошини ёрии таъҷилии дорои таҷҳизоти ҳозиразамон харид шудааст.Мошини ёрии таъҷилӣ аз ҷониби ду бунёди хайрияи бритониёӣ, «Go Help» ва «Roof of the World», аз ҳисоби маблағҳои «Тетис Петролиум» пешниҳод шуда, дар айни замон тавассути Аврупо ва Осиёи Марказӣ ба Тоҷикистон оварда мешавад. Интизор меравад, ки он моҳи сентябри соли равон ба ҷумҳурӣ ворид гардида ва ба ихтиёри яке аз беморхонаҳои маҳаллӣ гузошта мешавад.