Тақсими замин барои манзил идома дорад

Восеъ, 25 август (АМИТ «Ховар», С. Холов). – Дар ҷамоатҳои шаҳраку деҳоти ноҳияи Восеъ тақсими замин барои манзил идома дошта, эҳтиёҷмандон бо қитъаҳои замини наздиҳавлигӣ таъмин мешаванд. Ба иттилои раиси ҷамоати деҳоти Гулистон Сайҷафар Маҷидов баробари деҳқонон ба 47 нафар кормандони соҳаи маориф, 21 нафар кормандони сохторҳои қудратӣ ва хизматчиёни харбӣ, 9 нафар кормандони соҳаи тандурустӣ ва 3 нафар кормандони соҳаи маданият низ қарори дахлдор дар мавриди гирифтани қитъаи замин барои сохтани манзили истиқоматӣ супурда шудааст. Ба гуфти манбаъ, рӯзҳои наздик 29 ҷойи замини ҷудогардидаи фонди манзил дар ҳузури аъзои комиссия бо усули қуръапартой байни эҳтиёҷмандон тақсим карда мешавад.