Таъминоти об ва беҳдоштӣ дар Тоҷикистон

Душанбе, 12 август. (АМИТ «Ховар», Дилшодаи Хайруллоҳ).- Имрӯз дар ноҳияи Мӯъминободи вилояти Хатлон бо мақсади пешниҳоди дастгирии молӣ ва техникӣ баҳри амалигардонии лоиҳаи «Таъминоти об ва беҳдоштӣ дар Тоҷикистон» ба имзорасии Меморандуми ҳусни тафоҳум миёни Ҳукумати ноҳияи Мӯъминобод ва ташкилоти Оксфам дар Ҷумҳурии Тоҷикистон ба нақша гирифта шудааст. Меморандум аз ҷониби Раиси ноҳияи Муъминобод Сафаралӣ Зокиров ва иҷрокунандаи вазифаи Роҳбари ташкилоти Оксфам дар ҶТ Мадина Алибердиева ба имзо мерасад.Зимни баимзорасии Меморандум, ҳамчунин расман мавриди истифода қарор гирифтани Шабакаи ташкилотҳо оид ба устувории таъминоти об ва беҳдоштӣ дар ноҳияи Мӯъминобод ба нақша гирифта шудааст. Фаъолияти Шабака дар сатҳи маҳал дар ноҳияи Мӯъминобод ҳамкориҳоро бо истифода аз иваз намудани таҷриба ва иттилоъ бо мақомоти ҳукумати маҳал ва ҷонибҳои дигари таваҷҷӯҳдошта дар зерсохтори оби нӯшокӣ ва беҳдоштӣ, идоракунии системаи таъминоти оби нӯшокӣ ва беҳдоштӣ дар сатҳи маҳал дар бар мегирад.Лоиҳаи «Таъминоти об ва беҳдоштӣ дар Тоҷикистон» аз моҳи ноябри соли 2009 бо маблағгузории раёсати Швейтсария оид ба Рушд ва ҳамкорӣ ба фаъолият оғоз намуд, ки он аз ҷониби ташкилоти Оксфам амалӣ мегардад. Лоиҳаи номбурда дар асоси Барномаи давлатии «Беҳтар намудани таъмини оби нўшокии аҳолии ҶТ барои солҳои 2008-2020» ва баҳри таъсиси шароити мусоид барои дастрасии аҳолии деҳот бо оби нӯшокӣ ва беҳдошт, ҳамчунин ташкили шароити беҳтари рушд ва амалисозии шабакаҳои устувори оби нўшокӣ ба роҳ монда шудааст.