Тарҳи технологии «Inter plan»

Душанбе, 15 август.(АМИТ «Ховар», Марзия Саидова).- Дар остонаи ҷашни муқаддаси Истиқлолияти давлатӣ дар пойтахт ба истифода додани заводи истеҳсоли ноқилҳои барқӣ далели рушди саноат дар кишвар мебошад. Зеро баробари ба фаъолият шурӯъ кардани ин завод 200 нафар шаҳрвандон бо ҷойи кор таъмин шуда, вазъи иҷтимоияшон беҳтар мегардад. Сармоягузор ва фармоишгари иншоот Ҷамъияти саҳомии пӯшидаи «Talco Management Ltd» буда, пудратчии асосиаш Ҷамъияти саҳомии кушодаи «Сомон Тоҷиксохтмон» аст. Ҷамъияти саҳомии кушодаи «Саноатсоз» -и Душанбе лоиҳакаши иншоот ва ширкати олмонии«Inter plan» лоиҳакаши қисми технологияш мебошад. Ҳаҷми маблағгузории завод беш аз 140 миллион сомонӣ буда, дар он таҷҳизоти истеҳсоли ширкатҳои Финландияю Италия – «MAILLEFER Extrusion» ва «SICTRA SRL» насб гардидааст. Назар ба иттилои Шавкат Саидов, котиби матбуотии Раиси шаҳри Душанбе, иқтидори истеҳсолии завод 10 000 тонна ноқили барқӣ дар як сол мебошад.