Телевизиони миллии Украина Тоҷикистонро муаррифӣ мекунад

Душанбе, 17 август. (АМИТ «Ховар», Бекназари Абӯбакр). — Бо дастгирӣ ва ҳидояти Сафорати Ҷумҳурии Тоҷикистон дар Украина бо мақсади муаррифии дастовардҳои Ҷумҳурии Тоҷикистон дар солҳои Истиқлолтияти давлатӣ ҳайати эҷодии телевизиони миллии Украина ба Тоҷикистон сафари корӣ намуда, филми мустанадро ба навор мегирад. Дар доираи сафари худ гурӯҳи эҷодии телевизиони Украина бо сарварии журналисти маъруф, муаллифи барнома Надежда Базиф ба вилояти Суғд ташриф овард. Надежда Базиф ҳадафи аслии филмбардорӣ роҷеъ ба дастовардҳои Тоҷикистон дар даврони соҳибистиқлолиро шарҳ дода, гуфт, ки телевизиони миллии Украина роҷеъ ба тарзи ҳаёту зиндагии якчанд давлатҳои ҷаҳон филмҳои мустанад таҳия кардааст ва гурӯҳи эҷодӣ тасмим гирифт, ки тарзи ҳаёту зиндагӣ, урфу одат ва дастовардҳои Тоҷикистонро низ инъикос намояд. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки меҳмонон дар шаҳри Хуҷанд аз Осорхонаи таърихию кишваршиносии вилояти Суғд, бозори «Панҷшанбе» ва масҷиди Шайх Маслиҳаддин шинос шуда, аз мардуми оддӣ дар хусуси зисту зиндагонӣ ва дастовардҳои даврони Истиқлолият пурсон шуданд ва ҷойҳои таърихии Хуҷандро ба навор гирифтанд. Ба ҳайати эҷодии телевизиони Украина «Кохи матбуот», ки ба наздикӣ мавриди истифода қарор гирифт, хеле писанд омад. Ҳайати эҷодии телевизиони Украина бо гузориши корҳо дар корхонаи муштараки «Ҷавонӣ»-и шаҳри Хуҷанд ва маҷмааи шоҳ Исмоили Сомонии маркази вилоят низ шинос шуд. Меҳмонон ҳамчунин ба чойхонаи Боғи миллии «Ваҳдат», Нерӯгоҳи барқи обии Қайроққум, истироҳатгоҳҳои мавзеи соҳили Баҳри тоҷик шинос шуда, навор бардоштанд. Дар баробари ин, гурӯҳи эҷодӣ ба шаҳрҳои Истаравшану Панҷакент сафар карда, бо ходимони илмӣ, корхонаи муштараки «Оби зулол», шоҳроҳи Душанбе – Шаҳристон – Хуҷанд — Чаноқ шинос мешавад ва ҷараёни бунёди нақби Шаҳристонро ба навор мегирад. Бегоҳии рӯзи 15 август гурӯҳи эҷодии телевизиони миллии Украинаро раиси вилоят Қоҳир Расулзода ба ҳузур пазируфт. Раиси вилоят ба меҳмонон дар бораи дастовардҳои соҳаҳои иқтисодиёт ва иҷтимоиёти вилоят дар солҳои соҳибистиқлолӣ маълумот ва ба саволҳои намояндагони телевизиони миллии Украина посух дод.Умуман ҳайати эҷодии телевизиони миллии Украина бо нияти нек – инъикос намудани ҳаёту фаъолияти мардуми Тоҷикистон ташриф овардааст ва умед аст, ки комёбиҳои 20-соли Истиқлолияти давлатии Тоҷикистонро ба мардуми ҷумҳурии бародари Украина сазовор муаррифӣ мекунанд.