Зуҳуров ҳайати чиноиро ба ҳузур пазируфт

Душанбе, 22 август.(АМИТ «Ховар», Марзия Саидова).-«Миллати тоҷик дар симои Чин ҳамсояи наздик ва муҳимтарин шарики иқтисодиву тиҷоратии худро дар минтақа мебинад»,- гуфт Шукурҷон Зуҳуров, раиси Маҷлиси намояндагони Маҷлиси Олии Ҷумҳурии Тоҷикистон зимни мулоқоташ бо як ҳайати воломақом ва бонуфузи чиноӣ. Ҳайати мазкур таҳти сарварии аъзои доимии Кумитаи Бюрои сиёсии Кумитаи марказии ҳизби коммунистии Чин Чжоу Юнкан ба Душанбе омадааст.Раиси палатаи поёнии парлумони мамлакат дар мулоқот афзуд, ки саъю талошҳои Сарони кишварҳои Тоҷикистону Чин дар заминаи тақвияти ҳамкориҳои дуҷонибаи ҳар ду кишвар дар сатҳи минтақавию ҷаҳонӣ натиҷаи назаррас дода, ҳамчунин ба раванди рушди соҳаҳои мухталиф, бахусус иқтисодӣ мусоидат менамоянд. Тибқи иттилои Муҳаммадато Султонов, котиби матбуотии Маҷлиси намояндагон Шукурҷон Зуҳуров, қабл аз баррасии масъалаҳои байнидавлатии ҳар ду кишвар ҳайати чиноиро бо таърихи парлумони Тоҷикистон шинос намуд. Сипас байни тарафҳо мулоқоти судманд ҷараён гирифт. Шукурҷон Зуҳуров Чинро аз кишварҳои дӯсту бародар ва ҳамсояи наздики Тоҷикистон дониста, таъкид кард, ки имрӯзҳо байни Душанбе ва Пекин муносиботи хуби сиёсӣ, иқтисодӣ, тиҷоратӣ, фарҳангӣ ба роҳ монда шудааст, ки ин ба манфиати халқу миллатҳои тоҷику чин мебошад.Мусоҳибон доир ба вазъи минтақа ва ҷаҳон, бахусус авзои Афғонистон табодули назар карданд.