«Ҳамоҳангии минтақавӣ — 2011»

Душанбе, 27 сентябр. (АМИТ «Ховар», Лаззат Диловарзод).- Имрӯз дар пойгоҳи низомии Донишкадаи ҳарбии Вазорати мудофиаи Ҷумҳурии Тоҷикистон машқҳои муштараки «Ҳамоҳангии минтақавӣ -2011» анҷом меёбанд.Бино ба гуфти сардори маркази матбуоти Вазорати мудофиаи ҶТ Фаридун Маҳмадалиев, аз 17 – ум то 27 – уми сентябри соли 2011 дар пойгоҳи низомии Вазорати мудофиаи ҶТ машқҳои муштараки «Ҳамоҳангии минтақавӣ — 2011» бо иштироки намояндагони низомии ҷумҳуриҳои Тоҷикистон, Қазоқистон, Қирғизистон, Ҷумҳурии Исломии Афғонистон ва ИМА ҷараён доранд. Ба иттилои манбаъ, ҳадаф аз ташкилу баргузор намудани тамринҳои низомӣ омодагии мақомоти марбута оид ба пешгирии хатарҳои эҳтимолӣ, аз қабили заминларза, пешгирӣ, огоҳкунии мардум ва бартарафсозии оқибатҳои ин навъи ҳодисаҳои табиӣ аз ҷониби низомиён дар ин машқҳои муштарак мебошад. Ҳамчунин дар чунин тамринҳо, ки дар дигар давлатҳо низ гузаронида мешаванд, усулҳои нави омодагӣ бар зидди ҳаргуна хатарҳои эҳтимолӣ, аз ҷумла унсурҳои зиддитеррористӣ тарҳрезӣ мегарданд.