Ҳизбҳои сиёсӣ- унсури асосии институтҳои ҷомеаи шаҳрвандӣ

Душанбе, 19 сентябр. (АМИТ «Ховар», Дилшодаи Хайруллоҳ). – 20 сентябри соли равон дар толори Маркази Созмони Амнияту Ҳамкорӣ дар Аврупо (САҲА) дар шаҳри Душанбе мизи мудаввар дар мавзӯи «Танзими ҳуқуқии фаъолияти ҳизбҳои сиёсӣ ва иштироки занон дар ҳаёти сиёсии Тоҷикистон» баргузор мегардад.Ташкилкунандагони мизи мудаввар Ассотсиатсияи миллии сиёсатшиносони Тоҷикистон ва Дафтари Институтҳои Демократӣ ва Ҳуқуқи башар мебошад.Дар назар аст, ки роҳбари дафтари САҲА дар ҶТ сафир Ивар Вики, директори МТС назди Президенти ҶТ Сӯҳроб Шарипов, директори Ассотсиатсияи СҒҲ доир ба гендер ва пешгирии зӯроварӣ нисбат ба занон Алла Қувватова ва дигар намояндони вазорату идораҳо оид ба масъалаҳои муҳими рӯзмарра суханронӣ менамоянд.Ҳадафи асосии баргузории ин чорабинӣ таҳлили ҳамаҷонибаи ҳизбҳои сиёсӣ, ҳамкории иҷтимоӣ миёни онҳо ва пурзӯр намудани ҳамкории байни ҳукумат ва ҳизбҳои сиёсӣ чун унсури асосии институтҳои ҷомеаи шаҳрвандӣ мебошад.