17 адад нерӯгоҳи барқи обии хурд месозем

Душанбе, 29 сентябр. (АМИТ «Ховар», Дилшодаи Хайруллоҳ).- Бо мақсади таъминоти аҳолӣ бо қувваи барқ, махсусан аҳолии ноҳияҳои дурдаст, Ҳукумати Ҷумҳурии Тоҷикистон “Барномаи дарозмуддати бунёди силсилаи нерӯгоҳҳои хурди барқӣ дар давраи солҳои 2009 – 2020” аз 2 феврали соли 2009-ро қабул карда, тибқи он сохтмони 189 адад нерӯгоҳҳои барқи обии хурд бо маблағи умумии 123 млн. 134 ҳазор доллари амрикоӣ ва тавоноии 101,2 ҳазор кВт пешбинӣ шудааст. То 1 сентябри соли 2011 дар ҷумҳурӣ аз ҳисоби маблағҳои сармоягузорони ватанӣ 20 адад нерӯгоҳҳои хурди барқӣ бо иқтидори умумии 2,5 ҳазор кВт сохта ба истифода дода шуд, ки дар маҷмӯъ 1 ҳазору 841 хоҷагӣ ва 12 адад биноҳои маъмуриро бо қувваи барқ таъмин менамоянд. Сохтмони 17 адад нерӯгоҳи барқи обии хурд, ки иқтидори умумиашон 7,9 ҳазор кВт мебошад, идома дорад.