Афзоиши маблағгузорӣ ба соҳаи тандурустӣ

Душанбе, 12 сентябр. (АМИТ «Ховар», Дилшодаи Хайруллоҳ).- Давоми бист соли истиқлолият дар манотиқи гуногуни мамлакат зиёда аз 800 муассисаи тандурустӣ сохта ва ё таъмиру барқарор гардида, бо дастгоҳу таҷҳизоти муосири тиббӣ таъмин карда шуд. Дар ин давра Ҳукумат бо мақсади беҳдошти шароити зиндагӣ ва кору фаъолияти самараноки табибон маблағгузории соҳаи тандурустиро аз 956 ҳазор сомонӣ ба 600 миллион сомонӣ расонид, ки ин нисбат ба соли 1992-юм беш аз 620 баробар зиёд мебошад. Ҳамин тариқ, тўли солҳои истиқлолият барои беҳтар намудани сифати хизматрасонии тиббӣ, ҷорӣ кардани низоми муосири идоракунии соҳаи тандурустӣ, беҳбуди захираҳои кадрӣ ва таҳкими заминаҳои моддиву техникии муассисаҳои тиббӣ корҳои зиёд ба анҷом расид. Ҳукумати кишвар ба ҳифзи саломатии аҳолӣ, ки сарвати миллии ҳар як давлат ба ҳисоб меравад, таваҷҷўҳи ҳамаҷониба зоҳир менамояд ва барои таъмин намудани рушди минбаъдаи соҳа ва боз ҳам баланд бардоштани сатҳу сифати хизматрасонии тиббӣ ба аҳолӣ тадбирҳои зарурӣ меандешад.