Довталабон барои таҳсил ба Ветнам мераванд

Душанбе, 23 сентябр. (АМИТ «Ховар», Зарина Саидова).- Корхонаи воҳиди давлатии заводҳои ортопедию протезии Агентии давлатии ҳифзи иҷтимоӣ, шуғли аҳолӣ ва муҳоҷирати Вазорати меҳнат ва ҳифзи иҷтимоии аҳолии Ҷумҳурии Тоҷикистон дар ҳамкорӣ бо Фонди махсус барои маъюбони Кумитаи байналмилалии  Салиби Сурх  барои таҳсил  дар Маркази таълими технологияи ортопедии  шаҳри Ханойи Ветнам довталабонро интихоб намуд.Барои ба кишвари Ветнам  фиристодани  шаҳрвандони Тоҷикистон  барои  омўзиши касб дар риштаи ортопедӣ ва тайёр намудани мутахассисон барои завод ва филиалҳои он дар шаҳрҳои Хуҷанд, Кўлоб ва Хоруғ озмун эълон шуда буд,  ки тариқи он  3 нафар ҷавонони тоҷик интихоб гардида,  ба таҳсили сесола дар кишвари Ветнам фаро гирифта мешаванд. Вазорати меҳнат ва ҳифзи иҷтимоии  аҳолии Ҷумҳурии Тоҷикистон нисбат ба азнавсозии завод, таъмини он бо таҷҳизоти нави замонавӣ ва  беҳтар намудани сифати маҳсулот  мақсадҳои ҷиддӣ пеш гузошта, барои тайёр намудани кадрҳои болаёқати ҷавону соҳибихтисос  азм дорад.  Кумитаи байналмилалии  Салиби Сурх ҷиҳати аз бар намудани технологияи нав омода аст, ки  ба мутахассисони завод  кўмаки хешро расонад.