ФБ СС ва ҲА фаъолияташро тақвият мебахшад

Душанбе, 14 сентябр. (АМИТ «Ховар», Марзия Саидова). — Федератсияи байналмилалии Ҷамъиятҳои Салиби Сурх ва Ҳилоли Аҳмар дар ояндаи наздик  лоиҳаи омодагӣ ба офатҳои табиӣ ва вокуниш ба онҳо, кӯмак ба аҳолии ниёзманд, ёрии аввал дар сатҳи ҷомеа ва чорабиниҳои марбут ба саломатии ҷомеа, об ва беҳдоштиро дар Тоҷикистон тавсеа мебахшад. Масъалаи мазкур зимни мулоқоти Амиршо Миралиев, муовини аввали Раиси палатаи поёнии парлумони мамлакат бо Массимо Барра,  президенти комиссияи доимии Федератсияи байналмилалии Ҷамъиятҳои Салиби Сурх ва Ҳилоли Аҳмар дар Душанбе баррасӣ гардид.    А.Миралиев доир ба фаъолият, ироаи кӯмакҳои башардӯстона ва ҳамкории мутақобилан судманди он бо Тоҷикистон табодули назар карда, ба фаъолияти ин ниҳоди байналмилалӣ баҳои баланд дод.  Ҷамъияти мазкур дар миқёси Тоҷикистон наздики 70 бахш ва 15 ҳазор ихтиёриён дорад.Мусоҳибон дар ҷараёни мулоқот маҷмӯи масъалаҳои  тақвияти ҳамкориҳои мутақобилан судманди Тоҷикистонро бо ин созмони  байналмилалӣ баррасӣ намуданд.