Мулоқоти хоссаи Эмомалӣ Раҳмон бо сарварони давлатҳои узви ИДМ

Душанбе, 3 сентябр. (АМИТ «Ховар», Дилшодаи Хайруллоҳ).-Субҳи имрӯз Президенти ҶТ Эмомалӣ Раҳмон бо президентҳои як қатор кишварҳо мулоқоти як ба як анҷом дод. Президенти Ҷумҳурии Тоҷикистон Эмомалӣ Раҳмон бо Президенти Украина Виктор Янукович мулоқот намуд.Дар вохўрӣ масоили ҳамкории дуҷониба ва бисёрҷонибаи Тоҷикистону Украина баррасӣ шуд.Изҳори боварӣ карда шуд, ки сафари расмии қарибулвуқӯи Президенти Тоҷикистон ба Украина ба рушди минбаъдаи муносиботи судбахши ду кишвар такони ҷиддӣ мебахшад. Президенти Ҷумҳурии Тоҷикистон Эмомалӣ Раҳмон бо Президенти Туркманистон Қурбонқулӣ Бердимуҳаммадов низ мулоқот намуд. ,Дар мулоқот масоили ҳамкории гуногунпаҳлўи ду кишвар, аз ҷумла татбиқи амалии санадҳои сершумори ҳамкории дуҷониба баррасӣ шуд. Гуфтугўйи судманд ҳамчунин доир ба роҳҳои густариши ҳамкорӣ дар соҳаҳои энергетика, саноат, металлургия, нақлиёту роҳсозӣ, пайвасти мустақими шабакаҳои барқию нақлиётии ду кишвар ва атрофи масоили минтақавию байналмилалӣ сурат гирифт.Имрӯз ҳамчунин дар мулоқоти Президенти Ҷумҳурии Тоҷикистон бо Президенти Ҷумҳурии Арманистон Серж Саргсян масоили ҳамкории судманди ду кишвар баррасӣ шуданд. Серж Саргсян иттилоъ дод, ки ба истиқболи 20- умин солгарди Истиқлолияти давлатии Тоҷикистон барои Китобхонаи мўҳташами миллии навбунёд дар шаҳри Душанбе шумораи зиёди китобҳои илмию бадеӣ ва омўзишӣ доир ба соҳаҳои гуногуни ҳаёти ҷомеа тўҳфа овардааст.