Нишасти матбуотӣ дар ВКХ

Душанбе, 1 сентябр. (АМИТ «Ховар», Пайрав Назаров). – 30 август сардори Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷии Ҷумҳурии Тоҷикистон Давлаталӣ Назриев барои журналистони дохилӣ ва хориҷӣ нишасти матбуотӣ доир намуд.Ин чорабинӣ ба Мулоқоти чоргонаи президентҳои Тоҷикистон, Афғонистон, Покистон ва Русия, иҷлосияи Шӯрои сарони давлатҳои аъзои Иттиҳоди Давлатҳои Мустақил, маҷлиси Шӯрои вазирони корҳои хориҷии ИДМ ва ташрифоти расмии Президентҳои Русия ва Эрон ба Ҷумҳурии Тоҷикистон бахшида шуда буд. Д.Назриев хабар дод, ки аз 1 то 2 сентябр ташрифи Президенти Ҷумҳурии Исломии Афғонистон Ҳамид Карзай ва Президенти Ҷумҳурии Исломии Покистон Осиф Алӣ Зардорӣ сурат мегирад.«Ҳамид Карзай ва Осиф Алӣ Зардорӣ дар ҷараёни ташрифоташон бо Президенти Ҷумҳурии Тоҷикистон Эмомалӣ Раҳмон мулоқот анҷом медиҳанд. Сипас Президенти Афғонистон Ҳамид Карзай дар маросими ифтитоҳи бинои нави Сафорати Ҷумҳурии Исломии Афғонистон дар шаҳри Душанбе ширкат меварзад. Ҳамчунин Президенти Покистон Осиф Алӣ Зардорӣ дар маросими гузоштани санги аввали бинои нави Сафорати Ҷумҳурии Исломии Покистон дар шаҳри Душанбе иштирок мекунад», — зикр намуд Д.Назриев.Президентҳои Афғонистон ва Покистон дар Мулоқоти чоргонаи президентҳои Тоҷикистон, Афғонистон, Покистон ва Русия низ иштирок мекунанд.