Омодагӣ ба зимистон

Хоруғ, 6 сентябр. (АМИТ «Ховар», Л.Додо). — Дар ВМКБ ба зимистон омодагии ҷиддӣ мебинанд, зеро даймоҳи Бадахшон хеле сармоиву дароз аст. Тавре ҷонишини раиси вилоят Исрор Исроров ба хабарнигорамон иттилоъ дод, соли ҷорӣ тибқи талаботи муайянгардида дар муассисоти иҷтимоии вилоят ба миқдори зарурӣ ангишту ҳезум захира мешавад, ки аз нисф зиёди он аллакай вориди идороту муассисот гардидааст. Муассисоти соҳаи маориф 54 генератори коршоям доранд, ки ҳангоми камчинии нерӯи барқ аз онҳо истифода мекунанд. Ҳоло дастгоҳи дуюми нерӯгоҳи барқии «Помир – 1» таъмир шуда, дастгоҳҳои барқии обии Оқсу, Сипонҷ ва Хуҷанд фаъолият доранд.