Парчами рекордӣ аз абрешим омода шудааст

Душанбе, 8 сентябр.(АМИТ «Ховар», Марзия Саидова).- Вазни парчами давлатии Ҷумҳурии Тоҷикистон, ки фардо, 9 сентябр дар рӯзи таҷлили ҷашни 20-умин солгарди Истиқлолияти давлатии Ҷумҳурии Тоҷикистон дар ҷараёни тантанаҳои идона ба воситаи хиёбони Рӯдакӣ аз Майдони «Дӯстӣ» тавассути беш аз 3000 нафар гузаронида мешавад, 860 килограмм буда, дарозиаш 2011 ва паҳнояш 7 метр аст. Парчами давлатии Ҷумҳурии Тоҷикистон аз матои абрешим, ки онро шаҳрдории Душанбе аз Бишкек харидааст, тайёр гардидааст. Хушмаҳмад Ҷомаҳмадов, директори генералии Ҷамъияти дорои масъулияти маҳдуди Иттиҳодияи Истеҳсолии «Нассоҷии Тоҷик» зимни сӯҳбат ба хабарнигори АМИТ «Ховар» гуфт, ки парчам дар яке аз коргоҳҳои ИИ «Нассоҷии Тоҷик» дар зарфи ду ҳафта тайёр шуда, дар омода намудани он беш аз 20 нафар мутахассисону чеварон иштирок намудаанд.Бояд тазаккур дод, ки дар робита ба омода сохтани парчами давлатии бузург бо дарозии 2011 метр, ки ҳамчун рамз ба соли 2011 рабт дорад, шаҳрдории Душанбе ҷиҳати ворид намудани он ба китоби рекордҳои нави ҷаҳонӣ- Гиннес ба масуълини он дархост ироа сохтааст, то рекорди нави ҷаҳониро дар китоби Гиннес сабт созанд.