Рушди бесобиқаи саноат дар Кӯлоб

Душанбе, 8 сентябр. (АМИТ «Ховар», Лаззат Диловарзод).- Тавре аз дастгоҳи раиси шаҳри Кӯлоб ба мухбири АМИТ «Ховар» иттилоъ доданд, дар солҳои истиқлолият соҳаи саноати шаҳр бесобиқа пеш рафт. Агар то соли 1990 дар ин шаҳр 8 корхонаи саноатӣ ба қайд гирифта шуда бошад, айни замон дар маркази шаҳр 24 корхонаи гуногуни саноатӣ, аз ҷумла корхонаҳои саноатӣ оид ба коркарди пахта, пилла, маҳсулоти нафтӣ, маводи ғизоӣ ва консервакунонӣ фаъолият доранд.Ба таври дигар,  дар давраи истиқлолият 16 корхонаи саноатӣ бунёд ва ҳазорҳо ҷойи нави корӣ ташкил шуд. Истеҳсоли маҳсулоти корхонаҳои саноатӣ  рӯ ба афзоиш аст. Танҳо соли 2010 дар ҳаҷми 100 млн. сомонӣ маҳсулоти саноатӣ истеҳсол гардидааст. Муҳим он аст, ки аксари корхонаҳои саноатӣ фаъолияти худро бо истифода аз ашёи хоми маҳаллӣ ба роҳ мондаанд. Бо ташаббуси яке аз соҳибкорни ватанӣ дар арафаи ҷашни истиқлолияти давлатӣ корхонаи дӯзандагӣ барои 600 ҷойи корӣ дар ду баст ба кор оғоз кард. Дар  даврони соҳибистиқлолӣ аз ҳисоби корхонаҳои давлативу хусусӣ беш аз 30 ҳазор ҷойи нави корӣ муҳайё гардид, ки дар таърихи шаҳр беназир аст.