Соҳибкорони тоҷик дар «Экспо-2011-Покистон» иштирок мекунанд

Душанбе, 28 сентябр. (АМИТ «Ховар», Бекназар Абӯбакр).-Чанде пеш раиси Палатаи савдо ва саноати Ҷумҳурии Тоҷикистон Шариф Саид бо Сафири Фавқулодда ва Мухтори Ҷумҳурии Исломии Покистон дар ҶТ Амҷад Ҳусайн мулоқот намуд.Тавре ба АМИТ «Ховар» аз маркази матбуоти Палатаи савдо ва саноати ҶТ иттилоъ доданд, зимни мулоқот ҷонибҳо масоили фаъолгардонии ҳамкориҳои босамарро дар рӯҳияи созанда муҳокима намуданд. «Мо омодаи ҳамкории созанда бо соҳибкорони покистонӣ мебошем, мехоҳем, ки муносибатҳои дарозмӯҳлати муштаракро дар ин самтҳо беҳтар ба роҳ монем», изҳор намуд роҳбари Палатаи савдо ва саноати ҶТ дар ҷараёни сӯҳбат.Сафири Покистон роҳбари Палатаи савдо ва саноати ҶТ ва ҷамъияти соҳибкорони кишварро ба намоишгоҳи байналхалқии «ЭКСПО-2011-Покистон», ки 22-23 октябри соли 2011 дар шаҳри Қарочӣ доир мешавад, даъват кард ва таъкид намуд, ки маҳз ин намоишгоҳ барои дарёфти шарикони тиҷоратӣ ҷиҳати барқарорсозии ҳамкориҳои расмӣ дар сатҳи байналхалқӣ ба тоҷирони тоҷик имконият хоҳад дод.