Таҷлили Истиқлолияти ҶТ дар Липетск

Душанбе, 7 сентябр. (АМИТ «Ховар», Марҳабо Зунунова). – 20 – умин солгарди Истиқлолияти Ҷумҳурии Тоҷикистон боз дар як шаҳри Федератсияи Русия дар вазъияти ботантана таҷлил гардид. Ин дафъа сабқати тантанаро маркази вилояти Липетск, ки дар он даҳҳо ҳазор нафар ҳамватанони мо кору зиндагӣ мекунанд, қабул намуд. Фаъолони Созмони ҷамъиятии «Наврӯз» кӯшиш намуданд, ки дар ин ҷо вазъияти ҳақиқатан идонаро фароҳам оваранд. Дар варзишгоҳи шаҳр консерти калони дастаи мутрибон бо роҳбарии Баҳриддин Шарифов баргузор гардида, ҳамчунин мусобиқаи гӯштингирӣ ташкил карда шуд.Дар ин бора ба АМИТ «Ховар» корманди дафтари матбуоти Ҳукумати Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия Бахтиёр Сатторӣ иттилоъ дод. Мувофиқи суханони Б.Сатторӣ, ҳозирони идро роҳбари Созмони ҷамъиятии «Наврӯз» — и тоҷикони муқими Русия Ҳалимҷон Ёдгоршоев, корманди масъули Раёсати Хадамоти федералии муҳоҷирати Русия дар вилояти Липетск Татяна Андрасова ва роҳбари Созмони ҷамъиятии «Ватан» — и вилояти Воронеж Нишон Гулмирзоев муборакбод намуданд.