Таҷлили Рӯзи Истиқлолияти Тоҷикистон дар Урал

Душанбе, 12 сентябр. (АМИТ «Ховар», Марҳабо Зунунова). – Дар арафаи 20 – умин солгарди эълон шудани Истиқлолияти давлатии Ҷумҳурии Тоҷикистон аъзои ҷамъияти тоҷикон дар ду шаҳри минтақаи Урали Федератсияи Русия ин иди фархундаро таҷлил намуданд.Дар шаҳри Магнитогорски вилояти Челябински Федератсияи Русия маросими идро фаъолони Бунёди пуштибонӣ ва рушди равобити фарҳангию тиҷоратии «Мадад» — и шаҳрвандони Тоҷикистон бо мусоидати Хадамоти муҳоҷирати назди Ҳукумати Ҷумҳурии Тоҷикистон дар шахсияти Намояндагии Русия созмон доданд. Дар Хонаи дӯстии халқҳои шаҳри Магнитогорск маҷлиси ботантана баргузор шуд, ки дар он раиси Бунёди «Мадад» Бахтиёр Султонов, корманди Намояндагии Хадамоти муҳоҷирати ҷумҳурӣ дар Русия Шоҳназар Табаров, муовини сардори Раёсати шаҳрии фарҳанг Елена Гришко, муҳаррири рӯзномаи «Магнитогорский металл» Элла Гогелиани, раиси мухторияти миллию фарҳангии ҷамъияти тоҷикон дар шаҳри Орск Абдуқаюм Тошов суханони табрикӣ гуфтанд.Сипас дастаи мутрибони «Баҳор» ҳунарнамоӣ намуд. Меҳмонони ин чорабинӣ суруду оҳангҳои миллии тоҷикиро бо кафкӯбиҳо писанд намуданд.