Таъсиси бунгоҳҳои фосилавӣ

Душанбе, 8 сентябр. (АМИТ «Ховар», Лаззат Диловарзод).- Бино ба гуфти муовини ректори Донишгоҳи техникии Тоҷикистон (ДТТ) Субҳонқул Камолиддинов, дар заминаи донишгоҳи мазкур беш аз 10 сол боз маркази таҳсилоти фосилавӣ амал мекунад.Ба иттилои манбаъ, маводи таълимиву методии маркази таълими фосилавӣ аз Донишгоҳи давлатии иқтисоду омор ва Донишкадаи технологии хӯлаву пӯлоди шаҳри Маскав дастрас карда шудааст. Бо ёрии ин донишкадаву донишгоҳ китобҳои зиёди электронӣ вориди маркази таҳсилоти фосилавӣ гардонида шудаанд. Донишҷӯёни ДТТ ба номи М. Осимӣ ҳамарӯза имкони истифодаи китобхонаи электрониро пайдо намуданд. Тавассути ин китобхона дари донишгоҳу донишкадаҳои шаҳри Маскав барои донишҷӯёни ДТТ  ҳамеша кушодааст.- Мо  дар қаламрави кишвар имкони ҷорӣ намудани таҳсилоти фосилавиро дорем. Тасмим гирифтаем дар маркази вилоятҳои ҷумҳурӣ  бунгоҳҳои таҳсилоти фосилавиро  таъсис диҳем,- иброз дошт С. Камолиддинов ба мухбири АМИТ «Ховар».