Вазорати молия маблағгузориро афзуд

Душанбе, 23 сентябр. (АМИТ «Ховар», Дилшодаи Хайруллоҳ). — Яке аз омилҳои асосии дар мӯҳлати муайян захира намудани намудҳои сӯзишворӣ дар муассисаҳои соҳаи буҷетӣ ин саривақт аз ҷониби Вазорати молия ҷудо гардидани маблағҳо мебошад, ки дар ин самт нисбат ба солҳои гузашта пешравиҳо дида мешаванд.Тавре ба мухбири АМИТ «Ховар» иттилоъ доданд, Вазорати молияи Ҷумҳурии Тоҷикистон то ҳолати 1 сентябри соли ҷорӣ аз рӯи хароҷоти пардохти маблағҳои истифодаи қувваи барқу гармӣ ва гази табиӣ ба ташкилоту муассисаҳои соҳаҳои иҷтимоӣ, аз ҷумла ба соҳаи маориф — 4,7   млн. сомонӣ, тандурустӣ  1,3 млн. сомонӣ, фарҳанг  422 ҳазор сомонӣ, ҳифзи иҷтимоии аҳолӣ  1 миллион сомонӣ ва идоракунии давлатӣ  2,7 млн. сомонӣ  маблағгузорӣ  намудааст. Дар ин давра барои хариди сӯзишворӣ ва маводи молидании соҳаҳои номбаршуда 9,4 млн. сомонӣ маблағ ҷудо шудааст, ки ин нисбат ба ҳамин давраи соли 2010  2,7 млн. сомонӣ ё 40 фоиз зиёд мебошад.