3 миллиард сомонӣ барои татбиқи лоиҳаҳои стратегӣ

Душанбе, 26 октябр.(АМИТ «Ховар», Марзия Саидова).-  Дар буҷаи давлатии соли 2012 барои татбиқи лоиҳаҳои стратегӣ, таъмини истиқлолияти энергетикӣ, раҳоӣ аз бунбасти коммуникатсионӣ ва амнияти озуқаворӣ 3 миллиард сомонӣ пешбинӣ  шудааст. Ҳамзамон дар соли 2012 бо харҷи беш аз 145 миллион сомонӣ маблағҳои буҷа бояд мушкили норасоии оби нӯшокӣ дар 24 шаҳру ноҳияи кишвар, ба монанди Хоруғ, Кӯлоб ва Хуҷанд бартараф карда шавад.Бояд зикр кард, ки алҳол лоиҳаи Қонуни Ҷумҳурии Тоҷикистон «Дар бораи буҷаи давлатии Ҷумҳурии Тоҷикистон барои соли 2012» ҷиҳати  баррасӣ дар парлумони мамлакат қарор дорад. Бояд тазаккур дод, ки қисми даромади буҷаи давлатии Ҷумҳурии Тоҷикистон барои соли 2012 дар ҳаҷми 10 миллиарду 160 миллион сомонӣ ва қисми хароҷоташ 10 миллиарду 340 миллион сомонӣ ба нақша гирифта шудааст. Ин маблағ дар қиёс бо буҷаи соли 2011 мутаносибан 1 миллиарду 860 миллион ва 1 миллиарду 750 миллион сомонӣ зиёд аст.