Баҳриддин Камолиддинов дар фурудгоҳи Душанбе

Душанбе, 6 октябр. (АМИТ «Ховар», Фарҳоди Шомаҳмад).– 5 октябр бахшида ба рӯзи забони давлатии Ҷумҳурии Тоҷикистон дар фурудгоҳи байналмилалии Душанбе бо забоншиноси маъруф, Доктори илмҳои филологӣ, профессор, мудири кафедраи услубшиносии факултаи журналистика ва тарҷумонии Донишгоҳи миллии Тоҷикистон Баҳриддин Камолидддинов мулоқот барпо гардид. Профессор Б. Камолиддинов перомуни  сабабҳои қабул шудани қонун дар бораи забони давлатӣ, раванди амалӣ шудани он ва натиҷаҳои бадастомада маълумот дода, афзуд, ки забон бақои миллат аст ва ниёз ба ғамхорӣ, ғанигардонӣ,  сайқалдиҳӣ ва риояи меъёрҳои истифодабарӣ дорад.Профессор Б. Камолиддинов зимни сӯҳбат бо кормандони фурудгоҳи байналмилалии Душанбе дар мавриди  хизматҳои шоёни бузургони миллати тоҷик Саидризо Ализода, Бобоҷон Ғафуров, Садриддин Айнӣ, Мирзо Турсунзода, Муҳаммадҷон Шакурӣ мисолҳои зиёд оварда, таъкид намуд, ки барои ҷовидонӣ нигоҳ доштани забони тоҷикӣ ҳар як фарди тоҷик бояд кӯшиш намояд, зеро забон бақои миллат аст.