Бокс

Душанбе, 19 октябр. (АМИТ «Ховар», Аловиддин Бӯриев)- Имрӯз маҷмааи тозабунёди Хадамоти алоқаи ҷумҳурӣ аввалин мусобиқаи байналмилалиро дар риштаи бокс пазироӣ мекунад. Федератсияи бокси мамлакат мусобиқаи боксчиёнро барои ҷоизаи клуби «Шоҳона», ки солҳои охир шоистаи қабули тимҳои Осиёи Марказӣ гардидааст, дар ин макон барпо менамояд. Ба гуфти раиси Федератсияи бокси кишвар Бобоҷон Маҳмадрасулов, имрӯз соати 14-и вақти Душанбе расми кушоиши бозиҳо баргузор шуда, беҳтарин боксчиёни кишварҳои ҳамсояи дуру наздик барои ғалаба рӯи майдон меоянд ва дар давоми се рӯз бо ҳам рақобат мекунанд. Агар мусобиқа байни мардон дар 10 вазн гузарад, пас дар се вазн- 48, 60 ва 64 килограмм  бонувони Тоҷикистону Афғонистон бо ҳам қувва меозмоянд. Мусобиқот  се рӯз идома меёбанд.