Бокс: Анвар Юнусов ба олимпиада меравад

Душанбе, 5 октябр.( АМИТ «Ховар»,  Аловиддин Бӯриев). — Дар рӯзи 9-уми мусобиқаи  қаҳрамонии ҷоми ҷаҳон оид ба бокс, ки дар шахри Боку идома дорад, дар вазни 60 кг Мададӣ Нағзибеков бо боксчии маҷор Варга  Миклос вохӯрда ба мағлубият дучор шуд ва имконияти  ба даст овардани роҳхатро ба бозиҳои олимпии Лондон аз даст дод. Дар вазни то 91 кг толеъ ба боксчии дигари мо Ҷаҳон Қурбонов ҳам мадад накард. Баъди даври  аввали вохӯрӣ  бо боксчии номдори рус Артур Бетербиев ӯ аз идома додани вохӯрӣ даст кашид. Ҳамин тавр боз ду муштзани тоҷик аз идома додани вохӯриҳо дар канор монданд. Танҳо ба Анвар Юнусов муяссар гардид, ки дар вазни 56 кг ба мусобиқоти якчаҳорфиналӣ роҳ ёбад. Ӯ баъди ғалабааш бар Бойд Люк аз Австралия сазовори роҳхат ба бозиҳои Олимпии Лондон шуд. Имрӯз боксчии тоҷик дар рақобати якчаҳорфиналӣ бо Сергей Водопянови рус қувва месанҷад.