Буҷет хусусияти иҷтимоӣ дорад

Душанбе, 18 октябр.(АМИТ «Ховар», Марзия Саидова).- 5 миллиард сомонии буҷети давлатӣ барои соли 2012 ба рушди соҳаҳои иҷтимоию маориф, тандурустӣ ва ҳифзи иҷтимоии аҳолӣ нигаронида шудааст.Алҳол,  лоиҳаи Қонуни Ҷумҳурии Тоҷикистон «Дар бора буҷети давлатии Ҷумҳурии Тоҷикистон барои  соли 2012» дар Кумитаҳои палатаи поёнии парлумони мамлакат –Маҷлиси намояндагон мавриди  баррасӣ ва муҳокима қарор дорад.Қисми даромади буҷети давлатии Ҷумҳурии Тоҷикистон барои соли 2012 дар ҳаҷми 10 миллиарду 160 миллион сомонӣ ва қисми хароҷоташ 10 миллиарду 340 миллион сомонӣ ба нақша гирифта шудааст, ки дар қиёс ба буҷети соли 2011 мутаносибан 1 миллиарду 860 миллион ва 1 миллиарду 750 миллион сомонӣ зиёд аст.Маҷмӯи маҳсулоти дохилӣ дар буҷети соли 2012  дар ҳаҷми 35,8 миллиард сомонӣ, болоравии ҳаҷми истеҳсолот 7% ва таваррум 10,5% пешбинӣ гардидааст.     Интизор меравад, ки лоиҳаи Қонуни Ҷумҳурии Тоҷикистон «Дар бораи буҷети давлатии Ҷумҳурии Тоҷикистон барои соли 2012» нимаи авввали моҳи ноябр ҷиҳати баррасӣ ба иҷлосияи Маҷлиси намояндагон пешниҳод карда мешавад.