Довталабон барои таҳсил ба Ветнам мераванд

Душанбе, 19 октябр. (АМИТ «Ховар», Заррина Саидова).-   Корхонаи воҳиди давлатии заводҳои ортопедию протезии Агентии давлатии ҳифзи иҷтимоӣ, шуғли аҳолӣ ва муҳоҷирати Вазорати меҳнат ва ҳифзи иҷтимоии аҳолии Ҷумҳурии Тоҷикистон дар ҳамкорӣ бо Фонди махсус барои маъюбони Кумитаи байналмилалии  Салиби Сурх  барои таҳсил  дар Маркази таълими технологияи ортопедии  шаҳри Ханойи Ветнам довталабонро интихоб намуд.Барои ба кишвари Ветнам  фиристодани  шаҳрвандони Тоҷикистон  ҷиҳати омўзиши касб дар риштаи ортопедӣ ва тайёр намудани мутахассисон барои завод ва филиалҳои он дар шаҳрҳои Хуҷанд, Кўлоб ва Хоруғ озмун эълон шуда буд. Дар поении озмун 3 нафар ҷавони тоҷик, ки шавқи мутахассиси ин соҳа шуданро доранд, интихоб гардида,  ба таҳсили сесола ба кишвари Ветнам фиристода  мешаванд. Вазорати меҳнат ва ҳифзи иҷтимоии  аҳолии Ҷумҳурии Тоҷикистон  нисбат ба бозсозии корхона, таъмини он бо таҷҳизоти нави замонавӣ ва  беҳтар намудани сифати маҳсулот  мақсадҳои ҷиддӣ пеш гузошта, азм дорад кадрҳои болаёқати ҷавону соҳибихтисос  тайёр намояд.  Кумитаи байналмилалии  Салиби Сурх ҷиҳати аз бар намудани технологияи нав омода аст, ки  ба мутахассисони завод  кўмак расонад.