Имдоди Фокус

Хоруғ, 10 октябр. (АМИТ «Ховар»,  Л.Додо). —  Ташкилоти  Фокус  18  номгӯӣ таҷҳизот  ва лавозимотро, ки  ба  хотири  амалиёти ҷустуҷӯӣ мавриди  истифода қарор  дода  мешаванд,  чун  кӯмак ба  Ситоди  ҳолатҳои  фавқулодда ва  мудофиаи  граждании  ВМКБ  тақдим  намуд. Ҳамоҳангсози  минтақавии Фокус  дар  ВМКБ  Зарифбек  Қувватбеков  зимни  суханронӣ дар  ин  ҷамъомад  иброз  дошт, ки  Фокус ташкилоти  ҷаҳонӣ  оид ба  вокуниш  аз  вазъияти  бӯҳронӣ ва  коҳишдиҳии  офатҳои  табиӣ  мебошад.Тоҷикистон маҳз  дар  минтақаи  осебпазир  ва  офатҳои  табиӣ  мустақар  буда,  беш  аз  90 дар  садаш  кӯҳсор  аст.  Бадахшон, ки  қисмати  бузурги  он  мебошад,  макони  кӯҳҳои  ҳазорсолаи  азим,  рӯдҳои  пуртуғён,  кӯлҳои  дар  ҷаҳон баландтарину  азимтарин буда, дар ин ҷо   обхезӣ,  сел,  лағжиши кӯҳу сангҳо,  ярчу  заминларза  ҳодисоти  муқаррарист. Раиси  Кумитаи  ҳолатҳои  фавқуллода ва  мудофиаи граждании  назди  Ҳукумати Ҷумҳурии  Тоҷикистон Ҳабибуллоҳ  Латифов  нисбати  кӯмаку   дастгирии  беғаразонаи ташкилоти  Фокус  дар таъмини  Ситоди  ҳолатҳои   фавқулоддаи вилоят  бо таҷҳизоти  амалиётҳои  ҷустуҷӯӣ ва  наҷотдиҳӣ  изҳори  миннатдорӣ   намуд.